kāni punaḥ asya yogasya prayojanāni .
prayojanam apṛktaśilope num amāmau guṇavṛddhidīrghatvemaḍāṭśnamvidhayaḥ .
apṛktalope śilope ca kṛte num amāmau guṇavṛddhī dīrghatvam imaḍāṭau śnamvidhiḥ iti prayojanāni .
num : agne trī te vajinā trī sadhasthā , ta tā piṇḍānām .
num .
amāmau : he anaḍvan , anaḍvān .
guṇaḥ : adhok , aleṭ .
vṛddhiḥ : ni amārṭ .
dīrghatvam : agne trī te vajinā trī sadhasthā , ta tā piṇḍānām .
im : atṛṇeṭ .
aḍāṭau : adhok , aleṭ , aiyaḥ , aunaḥ .
śnamvidhiḥ : abhinaḥ atra , acchinaḥ atra .
apṛktaśilopayoḥ kṛtayoḥ ete vidhayaḥ na prāpnuvanti .
pratyayalakṣaṇena bhavanti .
na etāni santi prayojanāni .
sthānivadbhāvena api etāni siddhāni .
na sidhyanti .
ādeśaḥ sthānivat iti ucyate .
na ca lopaḥ ādeśaḥ .
lopaḥ api ādeśaḥ .
katham .
ādiśyate yaḥ saḥ ādeśaḥ .
lopaḥ api ādiśyate .
doṣaḥ khalu api syāt yadi lopaḥ na ādeśaḥ syāt .
iha acaḥ parasmin pūrvavidhau iti etasya bhūyiṣṭhāni lope udāharaṇāni tāni na syuḥ .
yatra tarhi sthānivadbhāvaḥ na asti tadartham ayam yogaḥ vaktavyaḥ .
kva ca sthānivadbhāvaḥ na asti .
yaḥ alvidhiḥ .
kim prayojanam .
prayojanam ṅaunakārlopettvemvidhayaḥ .
bhasañjñāṅīpṣphgorātveṣu doṣaḥ .
bhasañjñāṅīpṣphgorātveṣu doṣaḥ bhavati. bhasañjñāyām tāvat na doṣaḥ .
ācāryapravṛttiḥ jñāpayati na pratyayalakṣaṇena bhasañjñā bhavati iti yat ayam na ṅisambuddhyoḥ iti ṅau pratiṣedham śāsti .
ṅīpi api : na evam vijñāyate : aṇantāt akārāntāt .
katham tarhi .
aṇ yaḥ akāraḥ iti .
ṣphe api : na evam vijñāyate : yañantāt akārantāt iti .
katham tarhi .
yañ yaḥ akāraḥ iti .
goḥ ātve api : na evam vijñāyate : ami aci iti .
katham tarhi .
aci ami iti .
prayojanāni api tarhi tāni na santi .
yat tāvat ucyate ṅaunakārlopaḥ iti kriyate etat nyāse eva : na ṅisambuddhyoḥ iti .
ittvam api .
vakṣyati etat : śāsaḥ ittve āśāsaḥ kvau iti .
imvidhiḥ api : hali iti nivṛttam .
yadi hali iti nivṛttam tṛṇahāni atra api prāpnoti .
evam tarhi aci na iti api anuvartiṣyate .
na tarhi idānīm ayam yogaḥ vaktavyaḥ .
vaktavyaḥ ca .
kim prayojanam .
pratyayam gṛhītvā yat ucyate tat pratyayalakṣaṇena yathā syāt śabdam gṛhītvā yat ucyate tat pratyayalakṣaṇena mā bhūt iti .
kim prayojanam .
śobhanāḥ dṛṣadaḥ asya sudṛṣat brāhmaṇaḥ .
soḥ manasī* alomoṣasī* iti eṣaḥ svaraḥ mā bhūt iti .