ṣaṣṭhyāḥ sthāneyogatvāt ignivṛttiḥ .

ṣaṣṭhyāḥ sthāneyogatvāt sarveṣām ikām nivṛttiḥ prāpnoti .

asya api prāpnoti : dadhi madhu .

punarvacanam idānīm kimartham syāt .

anyatarārtham punarvacanam .

anyatarārtham etat syāt .

sārvadhādukārdhadhātukayoḥ guṇaḥ eva iti .

prasāraṇe ca .

prasāraṇe ca sarveṣam yaṇām nivṛttiḥ prāpnoti .

asya api prāpnoti : yātā vātā .

punarvacanam idānīm kimartham syāt .

viṣayārtham punarvacanam .

viṣayārtham etat syāt .

vacisvapiyajādīnām kiti eva iti .

uḥ aṇ rapare ca .

uḥ aṇ rapare ca sarvarkārāṇām nivṛttiḥ prāpnoti .

asya api prāpnoti kartṛ hartṛ .

siddham tu ṣaṣṭhyadhikāre vacanāt .

siddham etat .

katham .

ṣaṣṭhyadhikāre ime yogāḥ kartavyāḥ .

ekaḥ tāvat kriyate tatra eva .

imau api yogau ṣaṣṭhadhikāram anuvartiṣyete .

atha vā ṣaṣṭhadhikāre imau yogau apekṣiṣyāmahe .

atha vā idam tāvad ayam praṣṭavyaḥ .

sārvadhātukārdhadhātukayoḥ guṇaḥ bhavati iti iha kasmāt na bhavati : yātā vātā .

idam tatra apekṣiṣyate ikaḥ guṇavṛddhī* iti .

yathā eva tarhi idam tatra apekṣiṣyate evam iha api tad apekṣiṣyāmahe sārvadhātukārdhadhātukayoḥ ikaḥ guṇavṛddhī* iti.