laukika-vyavahāreṇa prakaṭa-līlā-rītyā ||
aparāhne vṛndāvanād vrajam āviśantaṁ śrī-kṛṣṇaṁ nirīkṣya tad-viraha-khinnāṁ sva-yūtheśvarīṁ prati kācit tat-priya-sakhī kṛṣṇāgamanam āvedayantī tad-darśanārthaṁ sakaruṇam āhvayati |
guru-janāt sakāśāt mandākṣaṁ lajjāṁ mā kuru, tadānīntana-kṛṣṇa-darśane sarveṣām evāviśeṣata autsukya-sambhavāt |
tasmāt geha-madhyāt gṛhābhyantarataḥ dehalīṁ dvāra-pīṭhikām eha āgaccha |
yataḥ akhilaṁ sarvam eva divasaṁ vyāpya viśleṣato hetoḥ klāntā avasannāsi |
tathāpi lajjayā gṛhāntarato nirgamanam anicchantīṁ tāṁ sākṣāt taṁ darśayanty āha—eṣa iti |
eṣa dṛśyamānaḥ mukundaḥ sarva-vrajaukasām evāviśeṣeṇa tad-viśleṣa-santāpa-mocakaḥ |
kimbhūtaḥ ? smeraḥ smita-yuktaḥ milati saṅgacchate mṛdule sarase iti yāvat |
etad-darśanārtham ābāla-vṛddha-jana-samūhe vrajān niṣkrānte’pi tasyā bahir āgamane śaithilya-darśanāt |
punaḥ kimbhūtaḥ ? vallavīnāṁ gopīnāṁ citta-hārī ceto-haraṇa-śīlaḥ |
anena tāsāṁ sarvāsām eva tatrāgatiḥ sūcitā |
punaḥ kimbhūtaḥ ? guñjāvalibhir hārī hāra-yuktaḥ |
punaḥ kīdṛśaḥ ? alibhir madhupair līldha āsvādito gandhaḥ śrīmad-aṅga-sahaja-saurabhaṁ vana-mālānulepādi-jāgantuka-saurabhaṁ ca yasya saḥ |
tavānukārāt subalaṁ didṛkṣuṇā mayā tvam āptā purataḥ sudurlabhā | sādṛśyataḥ kācam ivābhilaṣyatā premāgra-bhūmir vaṇijā hariṇmaṇiḥ || ||
[vi.mā. 5.28]