pūrva-rāga-prasaṅge śrī-kṛṣṇena sva-hastena parigumphya vṛndā-dvārā preṣitāṁ mālāṁ labdhvā śrī-rādhāyā ānandodrekeṇautsukyātiśayaḥ kavi-caraṇair varṇyate |
sakhi he śrī-rādhe ! goṣṭhādhīśvara-nandanaḥ śrī-kṛṣṇas tubhyaṁ tvad-arthaṁ tvāṁ sukhayitum iti vā, imāṁ mad-dhaste vartamānāṁ srajaṁ mālāṁ prāhiṇot prasthāpitavān |
kiṁ-bhūtaṁ srajaṁ ? suśliṣṭāṁ puṣpa-vṛndānām avirala-sanniveśena parama-ramyāṁ tathā nija-śilpasya kauśala-bharo naipuṇyātiśayas taṁ vyāhārtuṁ kathayituṁ prakāśayituṁ śīlaṁ yasyās tām |
ata evādbhutāṁ nirupamāṁ, iti evaṁ vṛndayā īritām uktāṁ giraṁ vācam ākarṇya śrutvā saroruha-dṛśaḥ śrī-rādhāyāḥ aṅgebhyaḥ akhilāvayavebhyaḥ sakāśāt svedoda-bindūnāṁ gharma-jala-kaṇānāṁ chalāt vyājataḥ kula-dharmaḥ kula-strīṇāṁ dharma-maryādā tena yad dhairyaṁ tad eva kartṛ abhitaḥ sarvato bahir niryayau nirjagāma iti śaṅke manye |