krīḍā-nikuñje viśākhayā saha viharamāṇaḥ śrī-kṛṣṇaḥ keli-kalāpaja-śrama-bharākrāntāyā api viśākhāyās tadānīntana-samudbhūta-śobhā-viśeṣaṁ tām eva sambodhya varṇayati |
bhujayor dvandvaṁ bāhu-yugalaṁ mandam alasaṁ ghana-svedaṁ niviḍa-gharma-yuktam |
dhṛtā madhurimṇāṁ mādhuryāṇāṁ sphūrtiḥ sphuraṇaṁ yayā sā mūrtis tanuḥ kartrī |
asāv iti sākṣād api parokṣavad bhāṣaṇaṁ pūrva-śobhānusmṛtyā |
varānane he śobhana-vadane ! tathāpi svāntaṁ manaḥ pramada-sudhayā ānandāmṛtenākrāntaṁ vyāptaṁ siktam ity arthaḥ |
pūrva-rasāmṛte (2.4.34) ca daśama-skandha-padyaṁ, yathā— tāsām ativihāreṇa śrāntānāṁ vadanāni saḥ |
prāmṛjat karuṇaḥ premṇā śantamenāṅga pāṇinā ||
[bhā.pu. 10.33.20] iti ||