śrī-kṛṣṇe mathurāṁ prayāte tad-viśleṣa-duḥsaha-santāpena krandantīṁ śrī-rādhāṁ viśākhā sāntva-vacanenāśvāsayati |
karabhāv iva urū yasyāḥ he tathā-bhūte ! maṇi-bandhād ākaniṣṭhaṁ karasya karabho bahiḥ ity amaraḥ |
karuṇāyāḥ kṛpāyāḥ varuṇālayaḥ samudraḥ |
pūrva-rasāmṛte’pi (3.2.57) daśama-skandha-padyaṁ, yathā— padā sujātena nakhāruṇa-śriyā bhuvaṁ likhanty aśrubhir añjanāsitaiḥ |
āsiñcatī kuṅkuma-rūṣitau stanau tasthāv adho-mukhy atiduḥkha-ruddha-vāk ||
[bhā.pu. 10.60.23] iti ||