asya lakṣaṇaṁ pūrva-rasāmṛte, yathā— svedo harṣa-bhaya-krodhādi-jaḥ kleda-karas tanoḥ ||
[bha.ra.si. 2.3.28] iti |
rāsa-krīḍā-varṇane śrī-parāśaroktiḥ |
gopīnāṁ kapolayoḥ saṁśleṣam āliṅganam abhipatya prāpya hareḥ śrī-kṛṣṇasya bhujau kartārau pulakodgama eva tāsāṁ kapola-bhūmau sasyaṁ tasmai tat sampādayituṁ, kriyārthopapadasya ca karmaṇi sthāninaḥ [pā. 2.3.14] iti tum-artha-dhātoś caturthī vidhānāt |
svedāmbuni gharma-jalāni tad-yukto yo ghano meghas tattāṁ tad-bhāvaṁ gatau prāptāv iti ||