Śrīmad Bhāgavatam 1.19.1

Show

SanskritHindiEnglish

Script

IASTदेवनागरीবাংলা

Commentary

ŚrīdharaJīvaViśvanāthaBaladeva

ŚB 1.19.1

sūta uvāca

mahī-patis tv atha tat-karma garhyaṁ
vicintayann ātma-kṛtaṁ sudurmanāḥ|
aho mayā nīcam anārya-vat kṛtaṁ
nirāgasi brahmaṇi gūḍha-tejasi ||

Translation

— translation pending —

Commentary

Śrīdhara Svāmī

bhāvārtha-dīpikā

prāyopaviṣṭe gaṅgāyāṁ rājñi yogi-janāvṛte | śukasyāgamanaṁ tatra proktam ekonaviṁśake ||

sva-kṛtaṁ tat-karma muni-skandhe sarpa-prakṣepaṇaṁ garhyaṁ nindyaṁ cintayan sudurmanā jātaḥ |

cintām evāha sādhārbhyām—aho iti |

nīcaṁ pāpam |

amīvam iti pāṭhe sa evārthaḥ |

brahmaṇi brāhmaṇe |

gūḍaṁ guptaṁ tejo yasya tasmin ||

Jīva Gosvāmī

krama-sandarbhaḥ

na vyākhyātam.

Viśvanātha Cakravartī

sārārtha-darśiṇī

rājānutapya nirvidya kṛte prāyopaveśane | ūnaviṁśe munīndrāṇāṁ sadasi śrī-śukāgamaḥ ||

atha sva-gṛhāgamana-kāle eva sudurrmanā abhūt |

cintām āha sārdhaṁ dvābhyām |

nīcaṁ nindyaṁ karma |

amīvam iti pāṭhe pāpam |

brahmaṇi brāhmaṇe ||

Baladeva Vidyābhūṣaṇa

vaiṣṇavānandinī

nṛpe'nutapya nirvidya prāya-bhṛtyūnaviṁśake | ājagmur munayas tatra tataḥ śrī-bādarāyaṇiḥ ||

atha gṛhāgama-kāle eva rājñaś cintām āha—mahīti sārdha-dvayena |

tat-karma tad aṁse sarpa-nikṣepa-rūpaṁ garhyaṁ nindyaṁ, sudurmanā babhūveti śeṣaḥ ||