anāśvāsa aviśvasanīye, vaiguṇya-bāhulyena kṛṣivat phala-niścayābhāvāt |
anena bhakter viśvasanīyatvaṁ dhvanitam |
dhūmenadhūmrau virañjitau ātmānau śarīra-citte yeṣām , karmaṇi ṣaṣṭhī, tān asmān ity arthaḥ |
pāda-padmasya yaśo-rūpam āsavaṁ makarandaṁ madhu madhuram |
atra satravat karmāntaram, yaśaḥ-śravaṇavad bhakty-antaraṁ ceti jñeyam |
tad evaṁ bhaktiṁ vinā karmādibhir asmākaṁ duḥkham evāsīd iti vyatirekatvam atra gamyate |
tad uktaṁ—yaśaḥ-śriyām eva pariśramaḥ paraḥ [bhā.pu. 12.12.40] ity-ādi |
ato vai kavayo nityaṁ [bhā.pu. 1.2.22] ity-ādi ca |
brahma-vaivarte ca śivaṁ prati śrī-viṣṇu-vākyam—
yadi māṁ prāptum icchanti prāpnuvanty eva nānyathā | kalau kaluṣa-cittānāṁ vṛthāyuḥ-prabhṛtīni ca | bhavanti varṇāśramiṇāṁ na tu mac-charaṇārthinām ||
[bhakti.sa. 99]