Premabase · Śrīmad Bhāgavatam · Canto 1 · Chapter 17
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.17.39
← 1.17.381.17.40 →
punaś ca yācamānāya jāta-rūpam adāt prabhuḥ |
tato’nṛtaṁ madaṁ kāmaṁ rajo vairaṁ ca pañcamam ||
Translation
— translation pending —
Commentary
Śrīdhara Svāmī
bhāvārtha-dīpikā
caturvidhasyāpy ekatraivāvasthānaṁ dehīti punar yācamānāya jāta-rūpaṁ suvarṇaṁ dattavān |
tataḥ suvarṇa-dānād anṛtam, madam, kāmam iti strīṣu saṅgam, raja iti rajo-mūlāṁ hiṁsām, etāni catvāri pañcamaṁ vairaṁ cādād iti ||
Jīva Gosvāmī
krama-sandarbhaḥ
na vyākhyātam.
Viśvanātha Cakravartī
sārārtha-darśiṇī
bho rājann etad vṛttāntaṁ śrutvā dyūtādikaṁ ko’pi nānuśīlayiṣyati |
kiṁ ca, prathamaṁ manasi mat-praveśas tata eva lokāḥ prāyo dyūtādikaṁ bhajante iti |
tatra bhavatā dīyamānam api sthāna-catuṣṭayam adattam evābhūt |
tasmād evaṁ kim api sthānam ahaṁ prāpnuyāṁ yal-lokair dustyajaṁ syād iti yācamānāya kalaye jāta-rūpaṁ svarṇopalakṣitaṁ rajatādikaṁ dravya-mātram eva tad-vāsa-sthānatvena adāt |
tata eva hetor dhanavatsu anṛtaṁ mithyā madaḥ pānādi-janitā mattatā kāmaḥ strī-saṅgaḥ, rajo garva iti caturvidho’dharmaḥ tathā pañcamaṁ vairaṁ ca syāt |
mada-kāmayoḥ klībatvam ārṣam ||
Baladeva Vidyābhūṣaṇa
vaiṣṇavānandinī
nanv etad-vṛttāntaṁ niśamya sarve dyūtādi tyajeyur atas tvayā dattam apy adattam iti punar yācamānāya kalaye jāta-rūpaṁ svarṇopalakṣitaṁ dhanaṁ tad-vāsārtham adāt |
svayaśo rakṣatā mayā śaraṇyatvāt saṁpratyayaṁ na hato datta-sthānaś ca kṛtaḥ |
yadi mad ājñānusārī na tiṣṭhet tadaitad-vadhaḥ suśaka eveti rājño bhāvaḥ |
tata eva hetor dhaniṣv anṛtādayaḥ |
anṛtaṁ mithyā, mada āsava-pānajā mattatā, kāmaḥ strī-saṅgaḥ |
rajo garva iti caturvidho 'dharmaḥ, vairaṁ ca pañcamaṁ syāt |
mad akāmayoḥ klīvatvam ārṣam ||
← 1.17.381.17.40 →