Śrīmad Bhāgavatam 1.16.24

Show

SanskritHindiEnglish

Script

IASTदेवनागरीবাংলা

Commentary

ŚrīdharaJīvaViśvanāthaBaladeva

ŚB 1.16.24

yadvāmba te bhūri-bharāvatāra-
kṛtāvatārasya harer dharitri |
antarhitasya smaratī visṛṣṭā
karmāṇi nirvāṇa-vilambitāni ||

Translation

— translation pending —

Commentary

Śrīdhara Svāmī

bhāvārtha-dīpikā

he amba mātaḥ he dharitri, te tava yo bhūri-bhāras tasyāvatāraṇārthaṁ kṛtāvatārasya karmāṇi smarantī tena visṛṣṭā satī śocasi |

nirvāṇaṁ vilambitam āśritaṁ yeṣu tāni |

pāṭhāntare nirvāṇaṁ viḍambitam upahasitaṁ yaiḥ |

mokṣād apy adhika-sukhānīty arthaḥ ||

Jīva Gosvāmī

krama-sandarbhaḥ

nirvāṇa-viḍambitānīty atra nirvāṇaṁ viḍambitaṁ yair iti vigrahaḥ |

nirvāṇasya sukhāditvāt pūrva-nipātaḥ |

ḍalayor ekatvāt pāṭha-dvayam api samānārtham ||

Viśvanātha Cakravartī

sārārtha-darśiṇī

bhuvo bhāras tasya avatāraṇārthaṁ kṛto’vatāro yena tasya karmāṇi smarantī |

yatas tena tvaṁ visṛṣṭā tyaktā |

nirvāṇaṁ kaivalyaṁ viḍambitaṁ sva-mādhuryeṇa upahāsāspadīkṛtaṁ yais tāni |

ḍa-layor aikyāt pāṭha-dvayam api samānārtham ||

Baladeva Vidyābhūṣaṇa

vaiṣṇavānandinī

amba he dharitri! antar hitasya hareḥ karmāṇi smarantī tena visṛṣṭā tyaktā satī śocasi |

kīdṛśasya? ity āha—te tava bharāvatārāya kṛto'vatāraḥ prākaṭyaṁ yena tasya |

karmāṇi kīdṛṁśi? ity āha—nirvāṇaṁ vilambitam āśritaṁ yeṣu tāni |

yad vā, ḍa-layor aikyāt nirvāṇaṁ viḍambitaṁ sva-mādhuryeṇopahasitaṁ yais tāni ||