Premabase · Śrīmad Bhāgavatam · Canto 1 · Chapter 11
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.11.27
← 1.11.261.11.28 →
śriyo nivāso yasyoraḥ pāna-pātraṁ mukhaṁ dṛśām |
bāhavo loka-pālānāṁ sāraṅgāṇāṁ padāmbujam ||
Translation
— translation pending —
Commentary
Śrīdhara Svāmī
bhāvārtha-dīpikā
etad evābhinayenāha |
śriyo lakṣmyāḥ yasya uro vakṣo nivāsaḥ |
yasya mukhaṁ sarva-prāṇināṁ dṛśāṁ saundaryāmṛta-pānāya pātram |
yasya bāhavo loka-pālānāṁ nivāsaḥ |
sāraṁ śrī-kṛṣṇaṁ gāyantīti sāraṅgā bhaktāḥ, teṣāṁ yasya padāmbujaṁ nivāsaḥ, taṁ nirīkṣamāṇānāṁ dṛśa iti pūrveṇānvayaḥ ||
Jīva Gosvāmī
krama-sandarbhaḥ
śriyaḥ preyasyāḥ |
yāḥ sarveṣām eva tat-priya-vargāṇāṁ dṛśaś cakṣūṁṣi, tāsām |
loka-pālānāṁ pālyānām |
sāraṅgāṇāṁ sarveṣām eva bhaktānām |
nivāsa āśrayaḥ |
yathā-svaṁ bhāvoddīpanatvāt ||
[prīti-sandarbha 156]
Viśvanātha Cakravartī
sārārtha-darśiṇī
yasya mukhaṁ pāna-pātraṁ saundaryāmṛta-pūrṇaṁ dṛśāṁ nivāsaḥ |
indrādīnāṁ loka-pālānāṁ yasya bāhavo nivāsaḥ, tad-balam āśrityaiva asurebhyo nirbhayās te sukhaṁ vasantīti bhāvaḥ |
sāraṁ tad-yaśo gāyantīti sāraṅgā bhaktāḥ, teṣāṁ, śleṣeṇa bhramarāṇāṁ padāmbujaṁ nivāsaḥ |
taṁ nirīkṣamāṇānāṁ dṛśaḥ iti pūrveṇānvayaḥ ||
Baladeva Vidyābhūṣaṇa
vaiṣṇavānandinī
yasya uraḥ śriyo nivāsaḥ, yasya mukhaṁ pāna-pātraṁ lāvanya-sudhā-pūrṇaṁ dṛśāṁ nivāsaḥ, yasya bāhavo loka-pālānām indrādīnāṁ nivāsaḥ, tān āśrityaiva te nirbhayā nivasanti |
yasya padāmbujaṁ saraṅgāṇāṁ tad-yaśo-gāyakānāṁ bhaktānāṁ nivāsaḥ |
taṁ nirīkṣamāṇānāṁ dṛśaḥ iti pūrveṇānuṣaṅgaḥ ||
← 1.11.261.11.28 →