evaṁ bhīṣmaḥ svābhilaṣitaṁ pārtha-sārathiṁ prāpa, lokās tu tad-avidvāṁso bhīṣmo brahmaṇi līno babhūva iti jānanti smety āha—sampadyeti |

ajñāne dṛṣṭāntaḥ—vayāṁsi pakṣiṇaḥ dinasyātyaye avasāne sati dinaṁ na dṛṣṭam iti dinasya svarūpa-dhvaṁsam eva jñātvā yathā tuṣṇīṁ bhavanti na śabdāyanta ity arthaḥ |

na tu vastuto dinaṁ naśyati, tat-kṣaṇe’pi varṣāntare tasya sthiter avagamāt yāma-catuṣṭayānantaraṁ tatrāpi punar āgamāt |

evaṁ bhīṣmasyāpy atyaye bhīṣmo mukta ity ajñā vidanti |

vijñās tu tadaiva prakaṭa-prakāśe ratha-caraṇa-pāṇinā kṛṣṇena bhūmau dhāvatā saha bhīṣmo yudhyata eveti punar āgāmi-kṛṣṇāvatāre tena saha bhīṣma āvirbhaviṣyaty eveti jānanti |

yad vā, niṣkaṁ padakaṁ lāti tasmin brahmaṇi śrī-kṛṣṇa ity arthaḥ |

brahma-sāyujya-prāptis tu na vyākhyeyā |

nitya-pārṣada-bhīṣmeṇa phalābhisandhi-rahitāyā rater vāñchitatvāt mokṣasyākāmitatvāt bhagavatāpi balād akāmita-phala-dānānaucityāt ||