Premabase · Śrīmad Bhāgavatam · Canto 1 · Chapter 9
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.9.23-24
← 1.9.221.9.25 →
bhaktyāveśya mano yasmin vācā yan-nāma kīrtayan |
tyajan kalevaraṁ yogī mucyate kāma-karmabhiḥ ||
sa deva-devo bhagavān pratīkṣatāṁ
kalevaraṁ yāvad idaṁ hinomy aham |
prasanna-hāsāruṇa-locanollasan-
mukhāmbujo dhyāna-pathaś catur bhujaḥ ||
Translation
— translation pending —
Commentary
Śrīdhara Svāmī
bhāvārtha-dīpikā
idānīṁ sva-deha-tyāga-paryantaṁ śrī-kṛṣṇāvasthānaṁ prārthayate—bhaktyeti dvābhyām ||
yāvad iti vilambaṁ dyotayati |
ahaṁ hinomi tyajāmīti svātantryam |
idam ity anātmatvena jñātam |
prasanna-hāsenāruṇa-locanābhyāṁ collasad ruciraṁ mukhāmbujaṁ yasya |
dhyānasya panthā viṣayaḥ |
yo’nyaiś cintyate levalaṁ so’grataḥ sthitaḥ san māṁ pratīkṣitām ity arthaḥ ||
Jīva Gosvāmī
krama-sandarbhaḥ
bhaktyeti yugmakam |
yogī samahitāntaḥ-karaṇaḥ san yasmin bhaktyā mana āveśya vā, vācā nama-mātraṁ kīrtayan vā kalevaraṁ tyajan mucyate ||
prasanna-hāsety ādinā tad-darśana-bahu-kālatārtham eva śarīra-tyage vilambaḥ kṛta iti labhyate |
tataś ca śarīrāntara-prāptau satyāṁ kadā vā darśanaṁ syād ity utkaṇṭhā-iṣṭatvād iti gamyate |
yāvan na me nara-daśā daśamī kuto’pi ity-ādikaṁ hi śrī-līlā-śukasyāpi prārthanaṁ śrūyate ||
Viśvanātha Cakravartī
sārārtha-darśiṇī
pratīkṣatāṁ kṣaṇam atraiva tiṣṭhatu, yāvad ahaṁ kiñcid vilambya cakṣurbhyām eva saundaryāmṛtaṁ piban svasya mano’nulāpaṁ prakāśayan staumīti bhāvaḥ |
mama upāsyatvād dhyānasya panthā viṣayībhūto yaḥ sarva-kālam eva bhavet, sa prasanna-hāsetyādi-rūpo’sminn anta-kāle sākṣān-nayana-gocara eva tiṣṭhatv iti bhāvaḥ |
catur bhuja iti bhīṣmasyopāsya-mantra-dhyānasya tathātvam avagamayati ||
Baladeva Vidyābhūṣaṇa
vaiṣṇavānandinī
yogopasṛṣṭa-bhakti-matāṁ tu sa naivam ity āha—bhaktyāveśyeti ||
ahaṁ khalu tad eka-prapannaḥ, sa me sarvaṁ kartety āha—sa iti |
yo'nyeṣāṁ dhyānapatho dhyānenaiva hṛdi bhāvyaḥ, sa me puraḥ-sthitaḥ san māṁ pratīkṣatām |
kiyat-kālam iti cet-tatrāha—yāvad idaṁ kalevaraṁ hinomi tyajāmīti tat-tyāge svātantryam |
cakṣurbhyāṁ tanmādhurya-sudhāṁ pivan svamanogataṁ ca stutyā prakāśarāmi, tāvad ity arthaḥ |
caturbhujam iti bhīṣmasyopāsya-rūpam uktam ||
← 1.9.221.9.25 →