Premabase · Śrīmad Bhāgavatam · Canto 1 · Chapter 8
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.8.36
← 1.8.351.8.37 →
śṛṇvanti gāyanti gṛṇanty abhīkṣṇaśaḥ
smaranti nandanti tavehitaṁ janāḥ |
ta eva paśyanty acireṇa tāvakaṁ
bhava-pravāhoparamaṁ padāmbujam ||
Translation
— translation pending —
Commentary
Śrīdhara Svāmī
bhāvārtha-dīpikā
asya pakṣasya siddhāntatām abhipretya śravaṇādi-phalam āha—śṛṇvantīti |
nandanty anyaiḥ kīrtyamānam abhinandanti |
ye janāḥ |
īhitaṁ caritam |
tāvakaṁ tvadīyaṁ padāmbujaṁ |
ta eva, paśyanty eva, acireṇa eveti ca sarvatrāvadhāraṇam |
kīdṛśam ? bhava-pravāhasya janma-paramparāyā uparamo yasmiṁs tat ||
kaivalya-dīpikā : śṛṇvanti iti |
evaṁ bhaktasya mukhyatvād brahma-sāyujyam uktvā tasyaiva bhagavat-sāmīpyādi-mukti-lipsoḥ stāḥ pradarśayitu-kāmas tv āha—kuntīti |
abhīkṣṇaśaḥ punaḥ punaḥ |
nandanti praśaṁsanti |
īhitaṁ karmata eva ye śravaṇādi-ratāḥ, nānye |
bhavaḥ saṁsāraḥ |
sa eva pravāhaḥ |
jala-pravāhavat patitaṁ na muñcanti |
uccāvaceṣu sthāneṣu pātayatīti pravāhaḥ |
tasya uparamaṁ vināśo yatra padāmbuje tat tathā |
etena sāmīpya-rūpā muktir uktā ||
[mu.pha. 19.28]
Jīva Gosvāmī
krama-sandarbhaḥ
na vyākhyātam.
Viśvanātha Cakravartī
sārārtha-darśiṇī
asya pakṣasya siddhāntatvam abhipretyāha—śṛṇvantīti |
te eva, na tv anye |
paśyanty eva, na tu na paśyanti |
acireṇaiva, na tu cireṇa |
tāvakam eva, na tvad-aṁśasya kasyacit |
bhava-pravāhoparamam eva, na tu saṁsārānivartakam |
padāmbujam eva, na tu tava nirviśeṣaṁ svarūpam iti |
artha-saundarya-lābhāya ṣaḍ-avadhāraṇāni draṣṭavyāni ||
Baladeva Vidyābhūṣaṇa
vaiṣṇavānandinī
ayaṁ pakṣaḥ siddhānta iti bhāvenāha—śṛnvantīti |
īhitaṁ caritam, anyaiḥ kīrtitena tena nandanti, samṛddhiṁ labhante |
ta eva nānye, paśyanty evācireṇaiva tāvakam eva, na tu tvad-aṁśasya kasyacit |
bhava-pravāhoparamam eva padāmbujam eva, na tu vaikuṇṭha-mātram ity arthaḥ |
saundaryāvadhāraṇāni bahūni yojyāni ||
← 1.8.351.8.37 →