udvigna-manāḥ kampita-hṛdayaḥ |
prāṇa-parīpsuḥ prāṇān labdhum icchur na tu kīrtim |
yāvad gamaṁ yāvad gantuṁ śakyaṁ tāvad urvyāṁ parādravad apalāyata |
ko brahmā mṛgo bhūtvā sutāṁ yabdhum udyataḥ san rudrasya bhayād yathā palāyate sma |
arka iti pāṭhe vāmana-purāna-kathā sūcitā |
tathā hi—vidyunmālī nāma kaścid rākṣaso maheśvaras tasmai rudreṇa sauvarṇaṁ vimānaṁ dattam, tato’sāv arkasya pṛṣṭhato bhrāmyan vimāna-dīptyā rātriṁ vilopitavān, tato’rkeṇa nija-tejobhir drāvayitvā tad vimānaṁ pātitam, tac chrutvā kupite rudre bhayād arkaḥ parādravat, tato rudrasya krūra-dṛṣṭyā dandahyamānaḥ patan vārāṇasyāṁ patito lolārka-nāmnā vikhyāta iti ||