Śrīmad Bhāgavatam 1.6.26

Show

SanskritHindiEnglish

Script

IASTदेवनागरीবাংলা

Commentary

ŚrīdharaJīvaViśvanāthaBaladeva

ŚB 1.6.26

etāvad uktvopararāma tan mahad
bhūtaṁ nabho-liṅgam aliṅgam īśvaram |
ahaṁ ca tasmai mahatāṁ mahīyase
śīrṣṇāvanāmaṁ vidadhe’nukampitaḥ ||

Translation

— translation pending —

Commentary

Śrīdhara Svāmī

bhāvārtha-dīpikā

tat prasiddhaṁ mahad-bhutam,asya mahato bhūtasya niḥśvasitam etad yad ṛg-veda [bṛ.ā.u. 2.4.10] ity-ādi-śruteḥ |

kīdṛśam ? īśvaraṁ sarva-niyantṛ |

nabhasi liṅgaṁ mūrtir yasya tan nabho-liṅgam |

sannihitam api na liṅgyata ity aliṅgaṁ,tasmai adṛṣṭāya bhagavate’vanāmaṁ praṇāmaṁ vidadhe kṛtavān aham |

tenānukampitaḥ san ||

Jīva Gosvāmī

krama-sandarbhaḥ

na vyākhyātam.

Viśvanātha Cakravartī

sārārtha-darśiṇī

mahad-bhūtam iti klīb-liṅgaṁ bhagavan-nāma—asya mahato bhūtasya niḥśvasitam etad yad ṛg-veda [bṛ.ā.u. 2.4.10] ity-ādi-śruteḥ |

tena yasya niḥśvasitam eva catvāro vedās tasya vacanaṁ tato’py atipramāṇam iti bhāvaḥ |

īśvaram atinikṛṣṭāya dāsī-putrāyāpi mahyaṁ tathā vara-pradānaṁ yad idam api tasyaikam īśvaratvam iti bhāvaḥ |

nabhasiākāśa eva liṅgaṁ cihnaṁ śrī-mukha-vacana-rūpaṁ yasya tat yato na liṅgyate na lakṣyate cakṣurbhyām adṛṣṭatvād aliṅgam ||

Baladeva Vidyābhūṣaṇa

vaiṣṇavānandinī

bhūtaṁ satyaṁ, tasya vā etasya mahato bhūtasya iti |

śravaṇāt, anvartha-tadākhyaṁ vā, upararāma tūṣṇīm asthāt |

tat kīdṛk? nabhasyākāśe śrī-mukha-vākya-rūpaṁ liṅgaṁ yasya tat |

na liṅgyate jñāyate bhakti-hīnair indriyair ity aliṅgaṁ, dāsī-putrāyāpi mahyam īdṛk-padārpaṇād īśvaram, avanāmaṁ praṇāmam ||