Premabase · Śrīmad Bhāgavatam · Canto 1 · Chapter 6
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.6.23
← 1.6.221.6.24 →
sakṛd yad darśitaṁ rūpam etat kāmāya te’nagha |
mat-kāmaḥ śanakaiḥ sādhu sarvān muñcati hṛc-chayān ||
Translation
— translation pending —
Commentary
Śrīdhara Svāmī
bhāvārtha-dīpikā
kutas tarhi dṛṣṭo’si ? tatrāha—sakṛd darśitaṁ mayeti yad etat kāmāya mayy anurāgāya |
tvat-kāmena kim ? ity ata āha—mat-kāmaḥ pumān |
hṛc-chayān kāmān ||
Jīva Gosvāmī
krama-sandarbhaḥ
tathaivāha—sakṛd iti |
yena kaṣāyā api naśyantīty āha—mat-kāma iti |
hṛcchayān anya-vāsanāḥ ||
Viśvanātha Cakravartī
sārārtha-darśiṇī
tarhi hā hā ! punar apy eka-vāraṁ darśanaṁ dehi ! ity ata āha—sakṛd iti |
etad eka-vāra-darśanaṁ te kāmāya tan manorathaṁ sādhayituṁ yogyam ity arthaḥ, na tu muhur darśanam |
autkaṇṭhasyānativṛddhyā premṇo’py anativṛddhas tasya tāruṇyaṁ na syād iti bhāvaḥ |
ata eva jāta-premṇe bhaktāya sādhaka-dehe eka-vāram eva darśanaṁ dadāmīti mama niyamaḥ |
yathā sādhaka-dehe bāla-bhūtaḥ premā viyogautkaṇṭhyena labdhātivṛddhiḥ siddha-dehe taruṇaḥ san, svādhāraṁ bhaktaṁ muhur api māṁ darśayati, sākṣāt sevayati ceti sva-bhakta-manoratha-pūrti-prakāram aham eva jānāmi, na tu me sva-bhakta iti bhāvaḥ |
mat-kāmaḥ—yo hi māṁ kāmayate, mātraṁ mad-darśanālābhe’pīty arthaḥ |
hṛc-chayān viṣaya-vāsanāḥ |
atrāpi sarvān mokṣyasi hṛcchayān ity anukter nāradaṁ prati nedaṁ vākyaṁ, kintu sva-bhakteḥ svabhāvaṁ tvaṁ jñāpayāmāsety evātra tattvam |
sarvam idaṁ dainya-vardhanārtham ity eke ||
Baladeva Vidyābhūṣaṇa
vaiṣṇavānandinī
tarhi kṛpayā punar api darśanaṁ dehīti cet-tatrāha—yad etad-rūpaṁ sakṛd-darśitaṁ, tatte kāmāya, kāmaṁ tṛṣṇāṁ vardhayitum ity arthaḥ |
tṛṣṇā-vṛddhy abhāve premṇas tasya tāruṇyāsiddhes tena siddha-dehe mad-rūpānubhavaṁ kṛtsnaṁ na vinded iti bhāvaḥ |
mat-kāmo mayi satṛṣṇaḥ sādhuḥ hṛcchayān vāsanāḥ, sādhāraṇam idaṁ vākyaṁ, na tu nāradaṁ pratīti bodhyam ||
← 1.6.221.6.24 →