Premabase · Śrīmad Bhāgavatam · Canto 1 · Chapter 5
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.5.40
← 1.5.391.6.1 →
tvam apy adabhra-śruta viśrutaṁ vibhoḥ
samāpyate yena vidāṁ bubhutsitam |
prākhyāhi duḥkhair muhur arditātmanāṁ
saṅkleśa-nirvāṇam uśanti nānyathā ||
Translation
— translation pending —
Commentary
Śrīdhara Svāmī
bhāvārtha-dīpikā
atas tvam apy evaṁ kurv ity āha—tvam iti |
adabhram analpaṁ śrutaṁ yasya, he adabhra-śruta ! vibhor viśrutaṁ yaśaḥ prakhyāhi kathaya |
yena viśrutenabuddhena vidāṁ viduṣāṁ bubhutsitaṁ boddhum icchā samāpyate | yad yato duḥkhaiḥ pīḍitānāṁ kleśa-śāntiṁ prakārāntareṇa na manyante ||40||
Jīva Gosvāmī
krama-sandarbhaḥ
yasmād evaṁ mama tad etat-paryantaṁ sarvaṁ tad-guṇa-śravaṇa-nidānakaṁ tac-chravaṇam eva tapa-ādīnāṁ paramaṁ phalam |
tasmāt tvam apīti ||
Viśvanātha Cakravartī
sārārtha-darśiṇī
he adabhra-śruta ! analpa-veda-śāstra-jña ! he sarvajña ! ity arthaḥ |
vibhorviśrutaṁ yaśaḥ prakhyāhi kathaya, yena viśrutena buddhena vidāṁ viduṣāṁ bubhutsitaṁ boddhum icchā samāpyate | tad-yaśo’mṛta-svāda-nimagnānāṁ sadā tad-eka-bhaktimatāṁ jñānāya spṛhaiva na bhaved ity arthaḥ |
anyathā prakārāntareṇa duḥkhaiḥ pīḍitānāṁ jīvānāṁ kleśa-śāntiṁ na uśanti na manyante vivekinaḥ ||
prathame pañcamo’dhyāyaḥ saṅgataḥ saṅgataḥ satām ||*||
Baladeva Vidyābhūṣaṇa
vaiṣṇavānandinī
evam upadiśy āha—tvam iti |
he adabhraśruta śruta-sarva-śāstra! tvaṁ vibhoḥ viśrutaṁ yaśaḥ prakhyāhi yena vidāṁ bubhutsitaṁ boddhum icchā samāpyate, tenaiva saveṣṭa-lābhāt, anyathā vidhāntareṇa kleśair muhur ardyamānānāṁ tan-nirvāṇaṁ nāśaṁ necchanti tattvavidaḥ |
na thalu dāvāgnir vṛṣṭim antarā vinaśyed iti bhāvaḥ ||
pañcamo’dhyāyaḥ | ||1.5||
(1.6)
← 1.5.391.6.1 →