tathā ca sāmni kauthumīya-śākhyāyāṁ chāndogyopaniṣadi ca—ṛg-vedaṁ bhagavo’dhyemi yajur vedaṁ sāma-vedam ātharvaṇaṁ caturtham itihāsaṁ purāṇaṁ pañcamaṁ vedānāṁ vedaṁ ity-ādi |
anyatra ca—vedān adhyāpayāmāsa mahābhārata-pañcamān iti |
anyathā pañcamatvaṁ nāvakalpeta samāna-jātīya-niveśitatvāt saṅkhyāyāḥ |
tṛtīya-skandhe ca vakṣyate—
itihāsa-purāṇāni pañcamaṁ vedam īśvaraḥ | sarvebhya eva vaktrebhyaḥ sasṛje sarva-darśanaḥ ||
[bhā.pu. 3.12.39]
pañcamatve kāraṇaṁ vāyu-purāṇe sūta-vākyam—
eka āsīd yajur vedas taṁ caturdhā vyakalpayat | cāturhotram abhūt tasmiṁs tena yajñam akalpayat ||
ādhvaryavaṁ yajurbhis tu ṛgbhir hotraṁ tathaiva ca | audgātraṁ sāmabhiś caiva brahmatvaṁ cāpy atharvabhiḥ ||
[vāyu.pu. 60.17-18]
ākhyānaiś cāpy upākhyānair gāthābhir dvija-sattamāḥ | purāṇa-saṁhitāś cakre purāṇārtha-viśāradaḥ ||
yac chiṣṭaṁ tu yajurveda iti śāstrārtha-nirṇayaḥ |
[vāyu.pu. 60.21-22]
iti skāndam āgneyam ity-ādi-samākhyās tu pravacana-nibandhanāḥ kāṭhakādivat ||