Śrīmad Bhāgavatam 1.4.4

Show

SanskritHindiEnglish

Script

IASTदेवनागरीবাংলা

Commentary

MadhvācāryaŚrīdharaJīvaViśvanāthaBaladeva

ŚB 1.4.4

tasya putro mahā-yogī sama-dṛṅ nirvikalpakaḥ |
ekānta-matir unnidro gūḍho mūḍha iveyate ||

Translation

— translation pending —

Commentary

Madhvācārya

bhāgavata-tātparyam

śrī-kṛṣṇārpaṇam astu |

nirvikalpakaḥ |

madīyaṁ tvadīyam iti bhedam apahāya sarvam īśvarādhīnam iti sthitaḥ |

māyām īśvara-rūpeṣu sarvatra tad-adhīnatām | paśyati jñāna-sampattyā vinidro yaḥ sa yogavit ||

Śrīdhara Svāmī

bhāvārtha-dīpikā

yad uktaṁ sa tu saṁśrāvayām āseti [1.3.42] tac-chukasya vyākhyānādikaṁ kathaṁ ghaṭitam iti praṣṭuṁ tasyāsaṅgodāsīnatām āha dvābhyām—tasyeti |

sama-dṛk samaṁ brahma paśyati |

ato nirvikalpakaḥ, svārthe kaḥ, nirasta-bhedaḥ |

kiṁ ca, ekasminn eva antaḥ samāptir yasyās tathābhūtā matir yasya saḥ |

yata unnidro māyā-śayanād udbuddhaḥ, yā niśā sarva-bhūtānāṁ tasyāṁ jāgarti saṁyamī [gītā. 2.69] iti smṛteḥ |

ata eva gūḍho’prakaṭaḥ |

mūḍha iva pratīyate ||

Jīva Gosvāmī

krama-sandarbhaḥ

na vyākhyātam.

Viśvanātha Cakravartī

sārārtha-darśiṇī

nirvikalpakaḥ nirbheda-jñānavān ekasminn eva antaḥ samāptir yasyāḥ sā matir yasya saḥ |

nidrā avidyā, tasyāḥ sakāśād udgataḥ |

yā niśā sarva-bhūtānāṁ tasyāṁ jāgarti saṁyamī [gītā. 2.69] iti smṛteḥ |

īyate pratīyate ||

Baladeva Vidyābhūṣaṇa

vaiṣṇavānandinī

sa tu saṁśrāvayāmāsa mahā-rājaṁ parīkṣitam ity uktaṁ, tat kathaṁ ghaṭitam iti praṣṭuṁ śukasyāsaṅgatvam āha—tasyeti |

mahā-yogī samādhi-niṣṭhaḥ, samadṛk loṣṭrāśmakāñcaneṣu tulya-dṛṣṭiḥ, nirvikalpaka idaṁ madīyam etad anyadīyam iti dhīśūnyaḥ |

ekasminn ātmanyantaḥ samāptir yasyās tādṛśī matir yasya, udagatā nidrā yasmāt sa naṣṭāvidya ity arthaḥ |

gūḍho'lakṣya-liṅgaḥ, īyate pratīyate ||