Premabase · Śrīmad Bhāgavatam · Canto 1 · Chapter 3
Show
SanskritHindiEnglish
Script
IASTदेवनागरीবাংলা
Commentary
MadhvācāryaŚrīdharaJīvaViśvanāthaBaladeva
ŚB 1.3.6
← 1.3.51.3.7 →
sa eva prathamaṁ devaḥ kaumāraṁ sargam āśritaḥ |
cacāra duścaraṁ brahmā brahmacaryam akhaṇḍitam ||
Translation
— translation pending —
Commentary
Madhvācārya
bhāgavata-tātparyam
kumāro nāma bhagavān svayaṁ svasmād ajāyata | dideśa brahmaṇe brahma brahmacarya-sthito vibhuḥ ||
yasmāt sanat-kumāraś ca brahmacaryam apālayat | yaḥ sthāṇoḥ sthāṇutāṁ prādād bhagavān avyayo hariḥ ||
Śrīdhara Svāmī
bhāvārtha-dīpikā
sanat-kumārādy-avatāraṁ tac-caritraṁ cāha—sa eveti |
kaumāra ārṣaḥ prājāpatyo mānava ity ādīni sarga-viśeṣa-nāmāni |
yaḥ pauruṣaṁ rūpaṁ jagṛhe sa eva devaḥ kaumārākhyaṁ sargam āsthitaḥ san brahmā brāhmaṇo bhūtvā brahmacaryaṁ cacāra |
prathama-dvitīyādi-śabdā nirdeśa-mātrāpekṣayā ||
Jīva Gosvāmī
krama-sandarbhaḥ
atha prācuryeṇa tad-avatārān kathayaṁs tad-aikya-vivakṣayā tad-aṁśāṁśinām apy avirbhāva-mātraṁ gaṇayati viṁśatyā |
tatra sa eveti |
yo’mbhasi śayānaḥ, yaś ca sahasra-pādādi-rūpaḥ, sa eva puruṣākhyo devaḥ |
ete cāṁśa-kalāḥ puṁsaḥ [bhā.pu. 1.3.28] ity upasaṁhārasyāpi saṁvādāt |
kaumāraṁ catuḥsana-rūpam |
brahmā brahmaṇo bhūtvā ||
Viśvanātha Cakravartī
sārārtha-darśiṇī
sanat-kumārādy-avatāraṁ tac-caritraṁ cāha—sa eveti |
yasyāṁśāṁśena devādayaḥ sṛjyante, sa eva padmanābha ity arthaḥ |
kaumāraṁ sargam āśritaḥ |
kumāreṣu prādurbhāvaṁ prāptaḥ san brahmā brāhmaṇo bhūtvā brahmacaryaṁ cacāra, svayam ācaraṇaṁ lokeṣu pracārayāmāsety arthaḥ |
prathama-dvitīyādi-śabdā nirdeśa-mātrāpekṣayā ||
Baladeva Vidyābhūṣaṇa
vaiṣṇavānandinī
atha sanatkumārādy avatārāṁs tat-karmāṇi cāha—sa eveti |
sa garbhodakaśayaḥ svayaṁprabhoḥ kṛṣṇasya svāṁśaḥ kaumāraṁ sargaṁ kumāreṣu prākaṭyam āśritaḥ prāptaḥ, brahmā vipro bhūtvākhaṇḍitaṁ brahmacaryañcacāra lokān śikṣayan iti caturbhir eko'yam avatāraḥ |
atra prathamādi-śabdāḥ saṅkhyā-pūrty apekṣā na tu kramāpekṣā bodhyāḥ ||
← 1.3.51.3.7 →