huśnugrahaṇam anarthakam .

kim kāraṇam .

anyasya abhāvāt .

na hi anyat sārvadhātuke asti yasya yaṇādeśaḥ syāt .

nanu ca ayam asti : yāti , vāti iti .

kṅiti anuvartate .

iha tarhi : yātaḥ , vātaḥ iti .

aci iti vartate .

iha tarhi : yānti , vānti .

yvoḥ iti vartate .

evam api dhiyanti , piyanti iti atra prāpnoti .

oḥ iti vartate .

evam api suvanti , ruvanti iti atra prāpnoti .

anekācaḥ iti vartate .

evam api asuvan , aruvan iti atra prāpnoti .

etat api aṭaḥ asiddhatvāt ekāc bhavati .

evam api prorṇuvanti iti atra prāpnoti .

asaṃyogapūrvasya iti vartate .

yaṅlugartham tarhi huśnugrahaṇam kartavyam .

yaṅlugantam anekāc asaṃyogapūrvam uvarṇāntam asti .

tadartham idam .

nadam yoyuvatīnām .

vṛṣabham roruvatīnām .

yaṅlugartham iti cet ārdhadhātukatvāt siddham .

yaṅlugartham iti cet tat na .

kim kāraṇam .

ārdhadhātukatvāt siddham .

katham ārdhadhātukatvam .

ubhayathā chandasi iti vacanāt .

anye api hi dhātupratyayāḥ ubhayathā chandasi dṛśyante .

evam tarhi siddhe sati yat huśnugrahaṇam karoti tat jñāpayati ācāryaḥ yaṅluk bhāṣāyām bhavati iti .

kim etasya jñāpane prayojanam .

bebhidīti , cecchidīti etat siddham bhavati bhāṣāyām api .