ārabhyamāṇe api etasmin yoge

siddham vasusamprasāraṇam ajvidhau .

vasusamprasāraṇam ajvidhau siddham vaktavyam .

kim prayojanam .

papuṣaḥ paśya .

tasthuṣaḥ paśya .

ninyuṣaḥ paśya .

cicyuṣaḥ paśya .

luluvuṣaḥ paśya .

pupuvuṣaḥ paśya iti .

vasoḥ samprasāraṇe kṛte aci iti ākāralopādīni yathā syuḥ iti .

kim punaḥ kāraṇam na sidhyanti .

bahiraṅgalakṣaṇatvāt asiddhatvāt ca .

bahiraṅgalakṣaṇam ca eva hi vasusamprasāraṇam asiddham ca .

āttvam yalopāllopayoḥ paśuṣaḥ na vājān cākhāyitā cākhāyitum .

āttvam yalopāllopayoḥ siddham vaktavyam .

kim prayojanam .

paśuṣaḥ na vājān .

paśuṣaḥ iti ātttvasya asiddhatvāt ātaḥ dhātoḥ iti ākāralopaḥ na prāpnoti .

cākhāyitā cākhāyitum iti āttvasya asiddhatvāt yasya halaḥ iti yalopaḥ prāpnoti .

samānāśrayavacanāt siddham .

samānāśrayam asiddham bhavati vyāśrayam ca etat .

iha tāvat papuṣaḥ paśya , tasthuṣaḥ paśya , ninyuṣaḥ paśya , cicyuṣaḥ paśya , luluvuṣaḥ paśya , pupuvuṣaḥ paśya iti .

vasau ākāralopādīni vasantasya vibhaktau samprasāraṇam .

paśuṣaḥ iti viṭi āttvam viḍantasya vibhaktau ākāralopaḥ .

cākhāyitā cākhāyitum iti yaṅi āttvam yaṅantasya ca ārdhadhātuke lopaḥ iti .

kim vaktavyam etat .

na hi .

katham anucyamānam gaṃsyate .

atragrahaṇasāmarthyāt .

nanu ca anyat atragrahaṇasya prayojanam uktam .

kim uktam .

atragrahaṇam viṣayārtham iti .

adhikārāt api etat siddham .

iha papuṣaḥ , cicyuṣaḥ , luluvuṣaḥ , dvau hetū vypadiṣṭau bahiraṅgalakṣaṇatvam asiddhatvam ca iti .

tatra bhavaet asiddhatvam pratyuktam bahiraṅgalakṣaṇatvam tu na eva pratyuktam .

na eṣaḥ doṣaḥ bahiraṅgam antaraṅgam iti ca pratidvandvibhāvinau etau arthau .

katham .

sati antaraṅge bahiraṅgam sati ca bahiraṅge antaraṅgam .

na ca atra antaraṅgabahiraṅgayoḥ yugapat samavasthānam asti .

na anabhinirvṛtte bahiraṅge antaraṅgam prāpnoti .

tatra nimittam eva bahiraṅgam antaraṅgasya .

hrasvayalopāllopāḥ ca ayādeśe lyapi .

hrasvayalopāllopāḥ ca ayādeśe lyapi siddhāḥ vaktavyāḥ .

praśamayya gataḥ , pratamayya gataḥ .

prabebhidayya gataḥ .

pracecchidayya gataḥ .

prastanayya gataḥ .

pragadayya gataḥ .

hrasvayalopāllopānām asiddhatvāt lyapi laghupūrvāt iti ayādeśaḥ na prāpnoti .

atra api eṣaḥ parihāraḥ samānāśrayavacanāt siddham iti .

katham .

ṇau ete vidhayaḥ ṇeḥ lyapi ayādeśaḥ .

vugyuṭau uvaṅyaṇoḥ .

vugyuṭau uvaṅyaṇoḥ siddhau vaktavyau .

babhūvatuḥ , babhūvuḥ : vukaḥ asiddhatvāt uvaṅādeśaḥ prāpnoti .

upadidīye , upadidīyāte : yuṭaḥ asiddhatvāt yaṇādeśaḥ prāpnoti .

vukaḥ tāvat na vaktavyaḥ .

vukam na vakṣyāmi .

evam vakṣyāmi : bhuvaḥ luṅliṭoḥ ūt upadhāyāḥ iti .

atra uvaṅādeśe kṛte yā upadhā tasyāḥ ūttvam bhaviṣyati .

evam api kutaḥ nu khalu etat uvaṅādeśe kṛte yā upadhā tasyāḥ ūttvam bhaviṣyati na punaḥ sāmpratikī yā upadhā tasyāḥ syāt bhakārasya .

na eṣaḥ doṣaḥ .

oḥ iti vartate .

tena uvarṇasya bhaviṣyati .

bhavet siddham babhūvatuḥ , babhūvuḥ .

idam tu na sidhyati : babhūva babhūvitha iti .

kim kāraṇam .

guṇavṛddhyoḥ kṛtayoḥ uvarṇābhāvāt .

na atra guṇavṛddhī prāpnutaḥ .

kim kāraṇam .

kṅiti ca iti pratiṣedhāt .

katham kittvam .

indhibhavatibhyām ca iti .

tat vai vayam kittvam pratyācakṣmahe vukā .

iha tu kittvena vuk pratyākhyāyate .

kim punaḥ atra nyāyyam .

vugvacanam eva nyāyyam .

sati api hi kittve syātām eva atra guṇavṛddhī .

kim kāraṇam .

iglakṣaṇayoḥ guṇavṛddhyoḥ saḥ pratiṣedhaḥ na ca eṣā iglakṣaṇā vṛddhiḥ .

evam tarhi na arthaḥ vukā na api kittvena .

stām atra guṇavṛddhī .

guṇavṛddhyoḥ kṛtayoḥ avāvoḥ ca kṛtayoḥ yā upadhā tasyāḥ ūttvam bhaviṣyati .

katham .

oḥ iti atra avarṇam api pratinirdiśyate .

iha api tarhi prāpnoti .

kīlālapaḥ paśya .

śubhaṃyaḥ paśya iti .

lopaḥ atra bādhakaḥ bhaviṣyati .

iha tarhi prāpnoti .

kīlālapau kīlālapāḥ iti .

evam tarhi vyoḥ iti vartate .

tena uvarṇam viśeṣayiṣyāmaḥ .

oḥ vyoḥ iti .

iha idānīm oḥ iti anuvartate .

vyoḥ iti nivṛttam .

yuṭaḥ ca api na vaktavyam .

yuḍvacanasāmarthyāt na bhaviṣyati .

asti anyat yuḍvacane prayojanam .

kim .

dvayoḥ yakārayoḥ śravaṇam yathā syāt .

na vyañjanaparasya anekasya ekasya vā yakārasya śravaṇam prati viśeṣaḥ asti .