strīviṣaye ṅyāpoḥ aprasiddhiḥ akārāntādarśanāt .

strīviṣaye ṅyāpoḥ aprasiddhiḥ .

khaṭvā mālā .

kim kāraṇam .

akārāntādarśanāt .

na hi akārāntatā dṛśyate .

nanu ca iyam dṛśyate .

atikhaṭvaḥ atimālaḥ iti .

na eṣā akārāntatā .

āpaḥ eva etat hrasvatvam .

sarveṣām tu svaravarṇānupūrvījñānārthaḥ upadeśaḥ .

sarveṣām eva tu prātipadikānām svaravarṇānupūrvījñānārthaḥ upadeśaḥ kartavyaḥ .

śaśaḥ .

ṣaṣaḥ iti mā bhūt .

palāśaḥ .

palāṣaḥ iti mā bhūt .

mañcakaḥ .

mañjakaḥ iti mā bhūt .

tasmāt siddham .

tasmāt siddham etat bhavati .

atha vā iyam akārāntatā dṛśyate .

pañcabhiḥ khaṭvābhiḥ krītaḥ paṭaḥ pañcakhaṭvaḥ daśakhaṭvaḥ .