supi sthaḥ bhāve ca .

supi sthaḥ iti atra bhāve ca iti vaktavyam .

iha api yathā syāt .

ākhūtthaḥ vartate .

śyenotthaḥ śalabhotthaḥ .

tat tarhi vaktavyam .

na vaktavyam .

yogavibhāgāt siddham .

yogavibhāgaḥ kariṣyate .

ātaḥ anupasarge kaḥ bhavati .

tataḥ supi .

supi ca ataḥ kaḥ bhavati .

kacchena pibati kacchapaḥ .

kaṭāhena pibati kaṭāhaḥ .

dvābhyām pibati dvipaḥ .

tataḥ sthaḥ .

sthaḥ ca kaḥ bhavati supi iti .

kimartham idam .

bhāve yathā syāt .

kutaḥ nu khalvu etat bhāve bhaviṣyati na punaḥ karmādiṣu kārakeṣu iti .

yogavibhāgāt ayam kartuḥ apakṛṣyate .

na ca anyasmin arthe ādiśyate .

anirdiṣṭārthāḥ pratyayāḥ svārthe bhavanti iti svārthe bhaviṣyanti .

tat yathā guptijkidbhyaḥ san yāvādibhyaḥ kan .

saḥ asau svārthe bhavan bhāve bhaviṣyati .