katham idam vijñāyate : ātmanepadam yau liṅsicau iti āhosvit ātmanepadeṣu parataḥ yau liṅsicau iti .

kim ca ataḥ. yadi vijñāyate ātmanepadam yau liṅsicau iti liṅ viśeṣitaḥ sic aviśeṣitaḥ .

atha vijñāyate ātmanepadeṣu parataḥ yau liṅsicau iti sic viśeṣitaḥ liṅ aviśeṣitaḥ .

yathā icchasi tathā astu .

astu tāvat ātmanepadam yau liṅsicau iti .

nanu ca uktam .

liṅ viśeṣitaḥ sic aviśeṣitaḥ iti .

sic ca viśeṣitaḥ .

katham .

ātmanepadam sic na asti iti kṛtvā ātmanepadapare sici kāryam vijñāsyate .

atha vā punaḥ astu ātmanepadeṣu parataḥ yau liṅsicau iti .

nanu ca uktam sic viśeṣitaḥ liṅ aviśeṣitaḥ iti .

liṅ ca viśeṣitaḥ .

katham .

ātmanepadeṣu parataḥ liṅ na asti iti kṛtvā ātmanepade liṅi kāryam vijñāsyate .

na eva vā punaḥ arthaḥ liṅviśeṣaṇena ātmanepadagrahaṇena .

kim kāraṇam .

jhal iti vartate .

ātmanepadeṣu ca eva liṅ jhalādiḥ na parasmaipadeṣu .

tat etat sijviśeṣaṇam ātmanepadagrahaṇam .

atha sijviśeṣaṇe ātmanepadagrahaṇe sati kim prayojanam .

iha mā bhūt : ayākṣīt , avātsīt .

na etat asti .

ikaḥ iti vartate .

evam api anaiṣīt , acaiṣīt : atra api prāpnoti .

etat api na asti prayojanam .

halantāt iti vartate .

evam api akoṣīt , amoṣīt : atra api prāpnoti .

na etat asti prayojanam .

jhal iti vartate .

evam api abhaitsīt , acchaitsīt : atra api prāpnoti .

na etat asti .

iglakṣaṇayoḥ guṇavṛddhyoḥ pratiṣedhaḥ na ca eṣā iglakṣaṇā vṛddhiḥ .

idam tarhi prayojanam : iha mā bhūt : adrākṣīt , asrākṣīt .

kim ca syāt .

akillakṣaṇaḥ amāgamaḥ na syāt .