pūrva-padyato’pi unmādasya prauḍhatā-vivakṣayā udāharaṇāntaram āha—yathā veti |
adyeti pūrvavat sa eva śrī-kṛṣṇaṁ prati tasyā prodbhaṭonmāda-ceṣṭitaṁ nivedayati |
mādhava he madhu-vaṁśotpanneti tavedṛśaṁ tasyā viraha-kheda-śamane śaithilyaṁ nocitam ity upālambha-garbha-sambodhanam |
adya samprati rādhā tīvrāt tava viprayogasya rabhasāt vegāt atyudrekāt hetoḥ anyā evābhūt bahir antaś ca nānā-vikāra-saṁvalanayā ākṛtyā prakṛtyā cāparaivāsīt |
etad eva kriyā-dvārā viśeṣaṇa-dvārā ca prapañcayati—ākāṇḍikam anavasarodbhavam aṭṭahāsa-paṭalaṁ prauḍha-hāsya-puñjaṁ gharmāmbu-bhāk-sveda-jala-stimitā satī nirmāti racayati, tathā camatkṛti-parā satī sotkaṇṭhaṁ yathā syāt tathā asmikam akasmād eva jātaṁ cītkāraṁ duḥśravya-nādaṁ kurute |
tathā atarkitaṁ sahasaiva ghargharaḥ svara-bhedena gadgada-yuktaś cāsau ghano niviḍaś ca ghoraḥ śabdo yatra tathā-bhūtam ākrandam uccareṇa krandanaṁ vitanoti vistārayati |
kila vārtāyām, vārtā-saṁbhāvyayoḥ kila iti nānārthāt |
sappī sappa{i} bhiṅga-paṁti-misado kālī rasālāṅkure rattāsoa-sire bireha{i} tadhā puppha-cchalādo sihī | siṅge kiṁsua-sāhiṇo a kaliā-dambheṇa sambhediṇī maṁ bheduṁ kusumāuhassa bala{i} kurāddha candalī ||
[vi.mā. 5.48]
puraḥ kvacana dhāvati sphurati citriteva kvacit tanoti hasitaṁ kvacit kvacana tīvram ākrandati | iyaṁ pralapati kvacit kvacana maunam ālambate mukunda-virahodgatair muhur adhīrādhibhiḥ || [la.mā. 3.24]
antar-latā-gṛham analpatamaṁ tamisraṁ āliṅgya sā tava tanu-bhramato vasanto | daivoditendu-kiraṇair virate'tha tasmin mā gāḥ priya tvam iti sīdati kṛṣṇa rādhā ||
[a.kau. 8.59]
bhramaya jaladān ambhogarbhān pramodaya cātakān kalaya śikhinaḥ kekotkaṇṭhān kaṭhoraya ketakān | virahiṇi jane mūrcchāṁ labdhvā vinodayati vyathām akaruṇa punaḥ saṁjñā-vyādhiṁ vidhāya kim īhase || [padyā. 326]