daiva-yogena śrī-kṛṣṇasyānya-pratipakṣa-nāyikā-sambandha-śravaṇena gṛhīta-mānā śrī-rādhā parama-catura-parivṛḍhena tena dākṣiṇyata eva sāmnā prasāditeti kavi-caraṇair varṇyate |
he sundari rādhe ! me mama aparādhena kartrā jātam udbhūtaṁ tat tu tathyaṁ satyam eva |
kiṁ-bhūtenāparādhena ? pṛthunā mahatā, kintu tvadīyo yaḥ svārasiko mayi naisargikaḥ snehaḥ sa eva śaraṇam avalambanaṁ rakṣitā vā, śaraṇaṁ gṛha-rakṣitroḥ iti nānārthāt |
yato balī balavān balavattvād anenāsūyerṣyādes tiraskāro dhvanitaḥ |
ity evaṁ harer giraṁ vācam ākarṇya śrutvā sā rādhā nata-mukhī lajjayā namrānanā satī bāṣpāmbhasām aśru-jalānāṁ dhārayā karaṇena kucau vakṣojau pūrṇau akārṣīt cakāra |
kiṁ-bhūtau ? anaṅgasya kāmasya utsava-kautuke maṅgala-ghaṭau |
asamasta-rūpako’yam, kucāv evānandotsava-raṅga-maṅgala-ghaṭāv ity arthaḥ ||
rohiṇy-adhara-śobhayā viharase jyeṣṭhāsi vāma-bhruvaṁ vāṇyā rājasi citrayā parijaneṣv ārdrāṁ dhiyaṁ yacchasi | rādhe tvaṁ śravaṇottareti paritas tārodayollāsinī nāśleṣārpaṇa-dīkṣite mayi kathaṁ dākṣiṇyam ātiṣṭhasi ||
[vi.mā. 5.29]
smara-krīḍā-lubdhaḥ paśupa-ramaṇīṣu sphuṭam ahaṁ tathāpy akṣṇor vartis tvam asi mama divyāñjana-mayī | tapādyāḥ kiṁ bhṛṅgaḥ pṛthulam ṛtu-lakṣmīr na bhajate rasollāsād enaṁ tad api hi madhu-śrīr madayati ||
[vi.mā. 5.33]
tuṇḍam unnamaya tāṇḍavitākṣaṁ lajjatāṁ divi kuraṅga-kalaṅkaḥ | mlānatāṁ tava samīkṣya vidūye jīvitād api mamābhyadhikāsi ||
[la.mā. 9.62]
antaḥ-prasāda-sudhayā plavanād viśuddhā śuddhāntatas tvam abhitaḥ svayam āgatāsi | etāṁ vṛthā prathayasi prabalām akāṇḍe kiṁ kuṇḍneśvara-sute mayi māna-mudrām ||
[la.mā. 9.63]
kajjala-sāmala-majjhaṁ palla-sāṇujjalaṁ muuṁdassa | guṁjāphallaṁ bba aharaṁ sahi pekkhantī pamodāmi ||
[la.mā. 9.64]
[kajjala-śyāmala-madhyaṁ pallava-śoṇojjvalaṁ mukundasya | guñjā-phalam ivādharaṁ sakhi paśyantī pramode ||] adya prasīda devi prāṇādhika-vallabhe sahasā | spṛśati na candra-kalāṁ ca tvāṁ candrāvali tamaḥ kim uta ||
[la.mā. 9.65]
tvad-aṅga-saṅgatair ebhis tapto’smi mihirātapaiḥ | vindantī candana-cchāyāṁ māṁ devi śiśirīkuru ||
[la.mā. 7.37]
śaitya-śriyā saurabha-sampadā ca nirdhūta-candra-dvaya-gauraveṇa | sva-vaibhavenādya mad-aṅgakāni vidhehi candrāvali nirvṛtāni ||
[la.mā. 8.38]
śrī-gīta-govinde ca, yathā—
vadasi yadi kiñcid api danta-ruci-kaumudī harati dara-timiram atighoram | sphurad-adhara-sīdhave tava vadana-candramā rocayatu locana-cakoram ||
priye cāru-śīle muñca mayi mānam anidānam | sapadi madanānalo dahati mama mānasaṁ dehi mukha-kamala-madhu-pānam ||dhruva-padam ||
satyam evāsi yadi sudati mayi kopinī dehi khara-nakhara-śara-ghātam | ghaṭaya bhuja-bandhanaṁ janaya rada-khaṇḍanaṁ yena vā bhavati sukha-jātam ||
tvam asi mama bhūṣaṇaṁ tvam asi mama jīvanaṁ tvam asi mama bhava-jaladhi-ratnam | bhavatu bhavatīha mayi satatam anurodhinī tatra mama hṛdayam atiyatnam ||
nīla-nalinābham api tanvi tava locanaṁ dhārayati koka-nada-rūpam | kusuma-śara-bāṇa-bhāvena yadi rañjayasi kṛṣṇam idam etad anurūpam ||
sphuratu kuca-kumbhayor upari maṇi-mañjarī rañjayatu tava hṛdaya-deśam | rasatu raśanāpi tava ghana-jaghana-maṇḍale ghoṣayatu manmatha-nideśam ||
sthala-kamala-gañjanaṁ mama hṛdaya-rañjanaṁ janita-rati-raṅga-parabhāgam | bhaṇa masṛṇa-vāṇi karavāṇi caraṇa-dvayaṁ sarasa-lasad-alaktaka-rāgam ||
smara-garala-khaṇḍanaṁ mama śirasi maṇḍanaṁ dehi pada-pallavam udāram | jvalati mayi dāruṇo madana-kadanāruṇo haratu tad-upāhita-vikāram ||
rādhikām adhi vacana-jātam | jayatu jayadeva-kavi-bhāratī-bhūṣitaṁ māninī-jana-janita-śātam ||
[gī.go. gītaṁ 19]
parihara kṛtātaṅke śaṅkāṁ tvayā satataṁ ghana- stana-jaghanayākrānte svānte parān-avakāśinī | viśati vitanor anyo dhanyo na ko'pi mamāntaraṁ praṇayini parīrambhārambhe vidhehi vidheyatām ||
[gī.go. 10.10]
mugdhe vidhehi mayi nirdaya-danta-daṁśa- dor-valli-bandha-niviḍa-stana-pīḍanāni | caṇḍi tvam eva mudam udvaha pañca-bāṇa- cāṇḍāla-kāṇḍa-dalanād asavaḥ prayānti ||
[gī.go. 10.11]
śaśi-mukhi tava bhāti bhaṅgura-bhrūr yuva-jana-moha-karāla-kāla-sarpī | tad-udita-bhaya-bhañjanāya yūnāṁ tvad-adhara-sīdhu-sudhaiva siddha-mantraḥ ||
[gī.go. 10.12]
vyathayati vṛthā maunaṁ tanvi prapañcaya pañcamaṁ taruṇi madhurālāpais tāpaṁ vinodaya dṛṣṭibhiḥ | sumukhi vimukhī-bhāvaṁ tāvad vimuñca na muñca māṁ svayam atiśaya-snigdho mugdhe priyo'yam upasthitaḥ ||
[gī.go. 10.13]
bandhūka-dyuti-bāndhavo'yam adharaḥ snigdho madhūka-cchavir gaṇḍaś caṇḍi cakāsti nīla-nalina-śrī-mocanaṁ locanam | nāsābhyeti tila-prasūna-padavīṁ kundābha-danti priye prāyas tvan-mukha-sevayā vijayate viśvaṁ sa puṣpāyudhaḥ ||
[gī.go. 10.14]
dṛśau tava madālase vadanam indu-sandīpanaṁ gatir jana-manoramā vijitārambhaṁ ūru-dvayam | ratis tava kalāvatī rucira-citra-lekhe bhruvāv aho vibudha-yauvataṁ vahasi tanvi pṛthvī-gatā ||
[gī.go. 10.15]
mādhuryam ādāya tavānanena kalaṅka-sāro vihitaḥ śaśāṅkaḥ | tenaiṣa rādhe tava vallabhatvād asannidhāne tava māṁ hinasti ||
[a.kau. 8.170]
pratyanīka-nāmālaṅkāraḥ |
trailokya-sampad iva nirbhara-garva-hetur mādhvīka-pītir iva vihvalāvidhātraī | prasvāpanāstra-phalikeva manobhavasya tvaṁ jñāna-viplava-karī mama bhāsi rādhe || [a.kau. 8.24]
dharma-vairūpyeṇa mālopameyam |