prāṇi-saṁyoga-viyogayor īśādhīnatvāc-choko na yogya ity uktam |
idānīṁ vastu-svarūpe parīkṣyamāṇe na śokāvakāśa ity āha—ya yadi lokaṁ jīva-rūpeṇa dhruvaṁ deha-rūpeṇādhruvaṁ manyase, na cobhayaṁ dhruvādhruva-bhinnam ity arthaḥ |
sarvarthā prakāratraye'pi te pitrādayaḥ śocyā na bhavanti |
dhruva-pakṣe kūṭasthatvān na śokaḥ adhruva-pakṣe nitya-vinaśvaratvān na saḥ, dhruvādhruva-bhinna-pakṣe tādṛśasyaikasyā-sattvena śokasya nirviṣayatvāt-tathā |
tarhi kiṁ-nimitto'yaṁ loke śokas tatrāha —snehād anyatra mohajād iti |
deha-gehādāvahaṁmameti viparīta jñānaṁ-mohaḥ, taj-jātāt snehād anyatreti tādṛśaḥ snehaḥ śokasthānam ity arthaḥ |
tathā ca bhrānti-janyaḥ snehaḥ śoka-hetur na hari-tad-bhakta-snehas tatheti ||