Premabase · Śrīmad Bhāgavatam · Canto 1 · Chapter 7
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.7.44-45
← 1.7.431.7.46 →
sa-rahasyo dhanur vedaḥ sa-visargopasaṁyamaḥ |
astra-grāmaś ca bhavatā śikṣito yad-anugrahāt ||
sa eṣa bhagavān droṇaḥ prajā-rūpeṇa vartate |
tasyātmano’rdhaṁ patny āste nānvagād vīrasūḥ kṛpī ||
Translation
— translation pending —
Commentary
Śrīdhara Svāmī
bhāvārtha-dīpikā
sa-rahasyo gopya-mantra-sahitaḥ |
visargo’stra-prayogaḥ upasaṁyama upasaṁhāraḥ tābhyāṁ sahito’stra-samūhaś ca ||
kīṁ ca tasya droṇasyātmā dehas tasyārdhaṁ kṛpy āste |
arhadtve hetuḥ—patnī |
ardho vā eṣa ātmano yat-patnī iti śruteḥ |
jāyāpaty agnim ādadhīyatā iti śruter ubhayor ekākāratvāvagamāc ca |
nanu bhartari mṛte sā kathaṁ jīvati tatrāḥa—nānvagād bhartāram |
yato vīra-sūḥ putravatī ||
Jīva Gosvāmī
krama-sandarbhaḥ
sa-rahasyam iti yugmakam ||
44-45||
Viśvanātha Cakravartī
sārārtha-darśiṇī
sa-rahasyo gopya-mantra-sahitaḥ |
visargopasaṁhārābhyāṁ sahita iti yadi brahmāstrasya visargopasamñamāv etat pituḥ sakāśān nājñāsyas tadā katham imaṁ vadhvā tvam āneṣyaity akṛtajñatā dhvanitā ||
prajā-rūpeṇa ātmā vai jāyate putraḥ iti nyāyena ātmano dehasyārdhaṁ kṛpī patnī ardho vā eṣa ātmano yat-patnī iti śruteḥ |
ata eva bhartāraṁ nānvagāt yato vīra-sūḥ ||
Baladeva Vidyābhūṣaṇa
vaiṣṇavānandinī
sarahasyo gopya-mantra-sahitaḥ |
visargeṇopasaṁyamenopasaṁhāreṇa ca sahitaḥ ||
prajā-rūpeṇeti—ātmā vai jāyate putraḥ ity ukteḥ |
ātmanano dehasyārddhaṁ patnī kṛpī āste vartate |
arddho vā eṣa ātmano yat-patnī iti śruteḥ |
bhartāraṁ nānvagāt, yato vīrasūḥ ||
← 1.7.431.7.46 →