dharmaṁ parīkṣamāṇena yadyapi coditaḥ tathāpi hantuṁ naicchat |

ātma-hanaṁ putra-hantāram api |

yato mahān kṛṣṇasya svabhāvābhijñaḥ |

tasya cāyaṁ svabhāvaḥ svayaṁ sarvajño’pi dharmādi-niṣṭhā-khyāpanāya tadvato bhaktān parīkṣata iti tatra mainaṁ pārthārhasi trātuṁ [bhā.pu. 1.7.35] ity-ādinā vīra-raudra-rasaṁ pradarśya dharmavantam arjunaṁ yathā parīkṣate sma tathā bhartuḥ śuśrūṣaṇaṁ strīṇāṁ paro dharma [bhā.pu. 10.29.24] ity-ādinā bhavatīnāṁ viyogo me nahi sarvātmanā kvacit [bhā.pu. 10.47.29] ity-ādinā, ahaṁ hi sarva-bhūtānām ādir anto’ntaraṁ bahir [bhā.pu. 10.82.45] ity-ādinā ca karma-jñāna-yogau pradarśya premavatīr gopīḥ |

varaṁ ca yat kañcana mānavendra vṛṇīṣva [bhā.pu. 4.20.16] ity-ādinā varaṁ vṛṇīṣva bhadraṁ te kāma-puro’smy aham ity-ādinā ca bhaugeśvarādīn pradarśya bhaktimataḥ pṛthu-grahalādādīn dīyamānaṁ na gṛhṇantīty ādinā anyān api bhaktān poarikṣāṁ cakāraiveti tadīya-siddha-bhaktā api tathā parīkṣante |

tathā hi śuka evaṁ ṣaṣṭha-skandhe pāpa-nistārārthaḥ pṛṣṭaḥ prāyaścitta-mātram uktvā parīkṣitaḥ siddhāntābhijñatāṁ navame śrī-kṛṣṇa-līlāṁ saṅkṣepeṇoktvā līlautsukyaṁ dvādaśe brahma-jñānam upakṣipya bhakti-niṣṭhāṁ parīkṣāṁ cakre iti |

na tatra tatra spaṣṭe’rthe tātparyam ||