Premabase · Śrīmad Bhāgavatam · Canto 1 · Chapter 3
Show
SanskritHindiEnglish
Script
IASTदेवनागरीবাংলা
Commentary
ŚrīdharaJīvaViśvanāthaBaladeva
ŚB 1.3.17
← 1.3.161.3.18 →
dhānvantaraṁ dvādaśamaṁ trayodaśamam eva ca |
apāyayat surān anyān mohinyā mohayan striyā ||
Translation
— translation pending —
Commentary
Śrīdhara Svāmī
bhāvārtha-dīpikā
dhanvantary-avatāram āha |
dhānvantaraṁ dhanvantari-rūpam |
dvādaśamādi-prayogas tv ārṣaḥ |
trayodaśamam eva rūpaṁ tac-caritena saha darśayati |
apāyayad ity atra sudhām ity adhyāharaḥ |
mohinyā striyā tad-rūpeṇa anyān asurān mohayan |
dhanvantari-rūpeṇāmṛtam ānīya mohinyā’pāyayad ity arthaḥ ||
kaivalya-dīpikā : avirati-hānārthaṁ mohinīm āha—dhānvantaram iti |
dhanvantari-rūpaṁ strī-rūpaṁ ca surān apāyayat sudhām iti śeṣaḥ |
anyān surān |
mohayan kena rūpeṇāmṛtānayanam |
pāyanaṁ mohinī-strī-rūpeṇety arthaḥ ||
[mu.pha. 3.24]
Jīva Gosvāmī
krama-sandarbhaḥ
bibhrad ity uttareṇānvayaḥ |
dvādaśamaṁ dhānvantaraṁ rūpaṁ bibhrat |
trayodaśaṁ mohinī-rūpaṁ bibhrat |
surān apāyayat sudhām iti śeṣaḥ |
kena rūpeṇa ? mohinyā striyā tad-rūpeṇety arthaḥ |
kiṁ kurvan ? anyān asurān mohayan, dhanvantari-rūpeṇa sudhāṁ copaharann iti śeṣaḥ |
ajitasyāvatārā ete trayaḥ [kūrma-dhanvantari-mohinīti] ||
Viśvanātha Cakravartī
sārārtha-darśiṇī
dhānvantaraṁ dhanvantary-avatāra-svarūpaṁ dvādaśaṁ bhavatīty anvayaḥ |
sudhā-kalasānayanaḥ cāsya karma jñeyam |
dvādaśamam ity-ādi-prayogas tv ārṣaḥ |
trayodaśamaṁ bibhrat surān apāyayat, sudhām ity śeṣaḥ |
kena rūpeṇa ? mohinyā striyā anyān asurān mohayan ||
Baladeva Vidyābhūṣaṇa
vaiṣṇavānandinī
dhanvantary avatāraṁ mohiny avatārañ cāha—dhānvantaraṁ svarūpaṁ dvādaśamaṁ bhavatīty anvayaḥ |
amṛta-ghaṭānayanam asya karma bodhyam |
dvādaśamam ity ādi-prayoga ārṣaḥ |
trayodaśamaṁ svarūpaṁ bibhrat surān apāyayat, sudhām iti śeṣaḥ |
kena rūpeṇety āha—mohinyā striyānyān asurān mohayan ||
← 1.3.161.3.18 →