kim udāharaṇam .

ayaṃsīt , vyaraṃsīt , anaṃsīt , ayāsīt , avāsīt .

na etat asti .

na asti atra viśeṣaḥ sati vā iṭi asati vā .

idam tarhi .

ayaṃsiṣṭām , ayaṃsiṣuḥ , vyaraṃsiṣṭām , vyaraṃsiṣuḥ , anaṃsiṣṭām , anaṃsiṣuḥ , ayāsiṣṭām , ayāsiṣuḥ , avāsiṣṭām , avāsiṣuḥ .

idam ca api udāharaṇam .

ayaṃsīt , vyaraṃsīt , anaṃsīt , ayāsīt , avāsīt .

nanu ca uktam na asti atra viśeṣaḥ sati vā iṭi asati vā iti .

ayam asti viśeṣaḥ .

yadi atra iṭ na syāt vṛddhiḥ prasajyeta .

iṭi punaḥ sati na iṭi iti pratiṣedhaḥ siddhaḥ bhavati .

mā bhūt evam hmyantānām iti evam bhaviṣyati .

atra api na iṭi iti anuvartate .

tat ca avaśyam iḍgrahaṇam anuvartyam adhākṣīt iti evamartham .

ākārāntāḥ ca api padapūrvāḥ ekavacane udāharaṇam .

mā hi yāsīt .

yadi atra iṭ na syāt anudāttasya īṭaḥ śravaṇam prasajyeta .

iṭi punaḥ sati uktam etat arthavat tu sicaḥ citkaraṇasāmarthyāt hi iṭaḥ udāttatvam iti tatra ekādeśaḥ udāttena udāttaḥ iti udāttatvam siddham bhavati