varṇagrahaṇam kimartham na sahivahoḥ ot asya iti eva ucyeta .

vṛddhau api kṛtāyām yathā syāt .

udavoḍhām , udavoḍham , udavoḍha iti .

atha avarṇagrahaṇam kimartham .

iha mā bhūt .

ūḍhaḥ , ūḍhavān iti .

na etat asti prayojanam .

bhavatu atra ottvam .

śravaṇam kasmāt na bhavati .

pūrvatvam asya bhaviṣyati .

idam iha sampradhāryam .

ottvam kriyatām pūrvatvam iti kim atra kartavyam .

paratvāt ottvam .

antaraṅgam pūrvatvam .

evam tarhi idam iha sampradhāryam .

ottvam kriyatām samprasāraṇam iti kim atra kartavyam .

paratvāt ottvam .

nityam samprasāraṇam .

kṛte api ottve prāpnoti akṛte api .

ottvam api nityam .

kṛte api samprasāraṇe prāpnoti akṛte api .

anityam ottvam .

na hi kṛte samprasāraṇe prāpnoti .

antaraṅgam pūrvatvam .

yasya ca lakṣaṇāntareṇa nimittam vihanyate na tat anityam .

na ca samprasāraṇam eva ottvasya nimittam vihanti .

avaśyam lakṣaṇāntaram pūrvatvam pratīkṣyam .

ubhayoḥ nityayoḥ paratvāt ottvam .

ottve kṛte samprasāraṇam samprasāraṇapūrvatvam .

tatra kāryakṛtatvāt punaḥ ottvam na bhaviṣyati .