atha gotrayūnayoḥ samāveśaḥ bhavati utāho na .
kim ca prāpnoti .
bāḍham prāpnoti .
na hi ayam ekasañjñādhikāraḥ .
kim ca ataḥ .
gotrayoḥ samāveśe kaḥ doṣaḥ . tatkṛtam bhavet .
gotrayoḥ samāveśe kaḥ doṣaḥ .
tatkṛtam prāpnoti .
gotrāśrayāḥ vidhayaḥ yūni api prāpnuvanti .
yāskāyanayaḥ lāhyāyanayaḥ .
yaskādibhyaḥ gotre iti luk prāpnoti .
yaskādiṣu na doṣaḥ asti na yūni iti anuvartanāt .
yaskādiṣu na doṣaḥ .
kim kāraṇam .
na yūni iti anuvartanāt .
na yūni iti tatra anuvartate .
kva prakṛtam .
na taulvalibhyaḥ iti .
doṣaḥ atribidapañcālāḥ na yūni iti anuvartanāt .
yadi na yūni iti anuvartate atrayaḥ bidāḥ pañcālāḥ māṇavakāḥ iti na sidhyati .
na eṣaḥ doṣaḥ .
sambandham anuvartiṣyate .
na taulvalibhyaḥ .
tadrājasya bahuṣu tena eva astriyām luk bhavati taulvalibhyaḥ yūni na .
yaskādibhyaḥ gotre luk bhavati yūni na .
taulvalibhyaḥ iti nivṛttam .
yañañoḥ ca atribhṛgukutsavasiṣṭhagotamāṅgirobhyaḥ ca luk bhavati .
yūni na iti nivṛttam .
iha tarhi kāṇvyayanasya chātrāḥ kāṇvyāyanīyāḥ .
kaṇvādibhyaḥ gotre iti aṇ prāpnoti .
kaṇvādiṣu na doṣaḥ asti na yūni asti tataḥ param .
kaṇvādiṣu doṣaḥ na asti .
kim kāraṇam .
na yūni asti tataḥ param .
kaṇvādibhyaḥ yaḥ vihitaḥ tadantāt prātipadikāt iti ucyate .
yaḥ ca atra kaṇvādibhyaḥ vihitaḥ na tadantam prātipadikam yadantam ca prātipadikam na asau kaṇvādibhyaḥ .
iha tarhi aupagavasya apatyam aupagaviḥ iti ekaḥ gotre iti etasmāt niyamāt pratyayaḥ na prāpnoti .
ekaḥ gotre pratipadam .
pratipadam atra pratyayāḥ vidhīyante gotrāt yūni astriyām iti .
tadantāt tarhi anekaḥ pratyayaḥ prāpnoti .
gotrāt yūni ca tat smaret .
gotrāt yūni astriyām iti tat smaret .
kim .
ekaḥ iti eva .
gotre tarhi aluk uktaḥ .
saḥ yūni api prāpnoti .
astu .
punaḥ yūni luk bhaviṣyati .
na evam śakyam .
phakphiñoḥ doṣaḥ syāt .
śālaṅkeḥ yūnaḥ chātrāḥ śālaṅkāḥ pailasya pailāḥ .
phakphiñoḥ anyatarasyām iti anyatarasyām śravaṇam prasajyeta .
tasmāt yuvasañjñāyām gotrasañjñāyāḥ pratiṣedhaḥ vaktavyaḥ .
na vaktavyaḥ .
tuḥ niyāmakaḥ .
tuḥ kriyate .
saḥ niyāmakaḥ bhaviṣyati : jīvati tu vaṃśye apatyam yuvasañjñam eva bhavati iti .
yadi tarhi yuvasañjñāyām gotrasañjñā na bhavati ye iṣyante yūni gotrāśrayāḥ vidhayaḥ te na sidhyanti .
gārgyāyaṇānām samūhaḥ gārgyāyaṇakam gārgyāyaṇānām kim cit gārgyāyaṇakam gārgyāyaṇaḥ bhaktiḥ asya gārgyāyaṇakaḥ .
gotrāśrayaḥ vuñ na prāpnoti .
evam tarhi .
rājanyāt vuñ manuṣyāt ca jñāpakam laukikam param .
yat ayam vuñvidhau rājanyamanuṣyayoḥ grahaṇam karoti tat jñāpayati ācāryaḥ laukikam param gotragrahaṇam iti .
yuvā ca loke gotram iti ucyate .
kimgotraḥ asi māṇavaka .
gārgyāyaṇaḥ .
kimgotraḥ asi māṇavaka .
vātsyāyanaḥ .
yadi etat jñāpyate aupagaveḥ yūnaḥ chātrāḥ aupagavīyāḥ iti gotre iti aṇ prāpnoti .
sāmūhikeṣu jñāpakam .
yadi sāmūhikeṣu jñāpakam gārgyāyaṇānām kim cit gārgyāyaṇakam gārgyāyaṇaḥ bhaktiḥ asya gārgyāyaṇakaḥ gotrāśrayaḥ vuñ na prāpnoti .
vuñvidhau jñāpakam .
vuñvidhau etat jñāpakam .
yadi vuñvidhau jñāpakam śālaṅkeḥ yūnaḥ chātrāḥ śālaṅkāḥ iñaḥ gotre iti aṇ na prāpnoti .
astu tarhi aviśeṣeṇa .
katham aupagaveḥ yūnaḥ chātrāḥ aupagavīyāḥ .
iñaḥ gotre iti aṇ prāpnoti .
na eṣaḥ doṣaḥ .
gotreṇa iñam viśeṣayiṣyāmaḥ .
gotre yaḥ iñ vihitaḥ iti .