laṅvadatideśe jusbhāvapratiṣedhaḥ .

laṅvadatideśe jusbhāvasya pratiṣedhaḥ vaktavyaḥ .

yāntu vāntu .

laṅaḥ śākaṭāyanasya eva iti jusbhāvaḥ prāpnoti .

utvavacanāt siddham .

utvam atra bādhakam bhaviṣyati .

anavakāśāḥ hi vidhayaḥ bādhakāḥ bhavanti .

sāvakāśam ca utvam .

kaḥ avakāśaḥ .

pacatu paṭhatu .

atra api ikāralopaḥ prāpnoti .

tat yathā eva utvam ikāralopam bādhate evam jusbhāvam api bādhate .

na bādhate .

kim kāraṇam .

yena na aprāpte tasya bādhanam bhavati .

na ca aprāpte ikāralope utvam ārabhyate .

jusbhāve punaḥ prāpte ca aprāpte ca .

atha vā purastāt apavādāḥ anantarān vidhīn bādhante iti evam utvam ikāralopam bādhate jubhāvam na bādhate .

evam tarhi vakṣyati tatra laṅgrahaṇasya prayojanam .

laṅ eva yaḥ laṅ tatra yathā syāt .

laṅvadbhāvena yaḥ laṅ tatra mā bhūt iti .