saṅgatam iti kim pratyudāhriyate .

ajaraḥ kambalaḥ .

ajaritā kambalaḥ iti .

kim punaḥ kāraṇam kartṛsādhanaḥ pratyudāhriyate .

na bhāvasādhanaḥ pratyudāhāryaḥ .

evam tarhi

ajaryam kartari .

ajaryam kartari iti vaktavyam .

tat tarhi vaktavyam .

na vaktavyam .

gatyarthānām ktaḥ kartari vidhīyate .

tena yogāt ajaryam kartari bhaviṣyati .

gatyarthānām vai ktaḥ karmaṇi api vidhīyate .

tena yogāt ajaryam karmaṇi api prāpnoti .

jīryatiḥ akarmakaḥ .

bhāve tarhi prāpnoti .

saṅgatagrahaṇam idānīm kimartham syāt .

kartṛviśeṣaṇam saṅgatagrahaṇam .

saṅgatam cet kartṛ bhavati iti .

tat yathā hṛṣeḥ lomasu iti lomāni cet kartṝṇi bhavanti .